Damdawiin te manganna leh harsatna tawh ngaihsak turin Mizoram sorkar ngen

by Editor

Tualchhung News

ZORAM TODAY| 21st October, 2025: MNF Senior Vice President Dr. R Lalthangliana, Dampa bial bye-election a MNF official candidate chuan Dampa West leh Dampa South Block khaw hrang hrangte a fan chhuah hnuin Phuldungsei, West Phaileng leh Marpara PHC te a tlawh.

Phuldungsei PHC-ah hian IV Grade hnathawk pawh an awm lo a, thawktute an indaih lo hle a, khawtlang mipui an buai hle bawk, niin tarlan a ni. Tin, Marpara leh West Phaileng PHC-te pawh tlawhin thawktu indaih loh avanga an manganna leh thawktute harsatna tawh hrang hrang a takin a hmuhpui bawk.

Health Minister hlui Dr. Thangtea chuan Phuldungsei PHC building hi a hun laia cheng nuai 277 senga ṭha taka sak zawh a nih thu a sawi a. Dampa bial hi Mamit District huam chhunga awm a nih angin, thlan tlin a nih chuan bial chhung khaw hrang hranga PHC leh Sub-Centre te pawh Aspirational District a nihna hmang ṭangkaiin, hriselna lamah hmasawnna a awm theih nan leh Staff indaih lohna avanga bial mipuiin harsatna an tawh ṭhin sukiang tura theihtawp chhuah a tum thu a sawi.

Dr. Thangtea chuan, Mizoram Sorkar pawh hian health sector lam phei hi chu mihring thih leh dam inkar a nih avangin ngaihsak bik se a duh thu a sawi a. MZP West Phaileng Branch pawhin nimin khan Dr. Thangtea hi an lo hmu bawk a ni.

Phuldungsei, Marpara leh West Phaileng PHC te manganna leh harsatna te hi ZPM Sorkar hian a rang thei ang bera an ngaihsak ka phut a ni, Dr. R Lalthangliana chuan a ti bawk.